Biopolimerin dodaqlardan çıxarılması səbəbləri
Biopolimer gellərlə dodaq böyütmə bir zamanlar populyar idi. Çünki belə preparatın yeridilməsi sadə və tez aparılır. Həm də görünən və uzunmüddətli (hətta çox) effekt təmin edir. Bəs biopolimer niyə təhlükəlidir? Müəyyən bir vaxta toxumalara yayılan və 3-12 ay ərzində tamamilə çıxan hialuron turşusundan fərqli olaraq, biopolimer geli dəri altında həmişəlik qalır. Toxumaların vəziyyəti dəyişir, daxili və xarici amillər səbəbindən gel öz yerini dəyişə bilir və bu, xoşagəlməz fəsadlara yol açır. Bu fəsadlara təkan verən amillər aşağıdakılardır:
- Mütəmadi mimika aktivliyi;
- Məişət mexaniki zədələnmələri;
- Kosmetoloji prosedurlar;
- Çeynəmə əzələlərinin fəallığı;
- Yerin cazibə qüvvəsi.
Başqa sözlə desək, zamanla biopolimer yeridildiyi sahəni deformasiyaya uğrada bilər. Dodaqlarda bərkimələr, qabarmalar əmələ gəlir, qan dövranı pozulur ki, bu da toxuma nekrozlaşmasına gətirib çıxarır. Dəri rəngi dəyişir.
Gelin çıxarılma metodları
Biopolimer cərrahi müdaxilə ilə çıxarılır. Bir qayda olaraq, yerli anesteziya istifadə edilir. Əməliyyatdan qorxan pasiyentlərə ümumi narkoz təklif oluna bilər.
İç tərəfdən səliqəli dodaq kəsiyi edilir. Kəsik skalpel, yaxud lazerlə edilə bilər. Sonra toxumalardan gel fraqmentlərinin tədricən çıxarılması aparılır. Anlamaq vacibdir ki, gelin birdəfəyə çıxarılması həmişə mümkün olmur. Bunun səbəbi biopolimer gelin toxumalara nüfuz edərək miqrasiyaya uğramaq özəlliyidir. Məhz buna görə plastik cərrah çox vaxt zamanla təkrar müdaxilənin tələb olunacağı barədə pasiyentə xəbərdarlıq edir.
Hər cərrah biopolimer çıxarılmasını boynuna götürmür. Bu, incə, həssas işdir və təkcə təcrübəli plastik cərrah deyil, həm də əsl estetist tərəfindən icra edilməlidir. Axı əməliyyatın yekun məqsədi təbii dodaq ölçülərinin bərpasıdır. Alt və üst dodaqlar arası optimal nisbət 1:1,5-dir.
Əməliyyat vaxtı orta hesabla 30 dəqiqədən 1 saatadəkdir. Çıxarılma sonrası cərrah sonradan görünməyəcək səliqəli tikiş qoyur. Selikli qişa tez regerasiya etdiyindən reabilitasiyaya da yaxşı təsir edir.
Reabilitasiya dövrü
Orta hesabla ilkin bərpa üçün toxumalara bir həftə tələb olunur. Bu dövrdə zəruridir:
- Təyin olunmuş antiseptik məhlulla ağızı yaxalamaq;
- Duru və yumşaq pəhriz yeməkləri yemək (kəskin, duzlu və sərt qidalar qadağandır).
Reabilitasiya vaxtı hamama, saunaya, solyariyə getmək, qaralmaq tövsiyə olunmur.
Müdaxilədən 2 ay sonra yekun nəticə görünür. Bundan sonra təkrar cərrahi korreksiya aparıla bilər.
